Pedro Sánchez yá ye presidente

Séptimu presidente en democracia y primeru por una moción de censura

El plenu del Congresu los Diputaos aprobó güei la moción de censura presentada pol PSOE escontra Mariano Rajoy y que fai presidente del Gobiernu al líder socialista, Pedro Sánchez.

La Cámara Baxa dio'l sí" a Sánchez por 180 votos a favor -PSOE, Xuníos Podemos, ERC, PNV, PDeCAT, Compromís, EH-Bildu y Nueva Canarias-, 169 escontra -PP, Ciudadanos, UPN y Foro-, y l'abstención de Coalición Canaria.

Ye la primer moción de censura que sal alantre en democracia, dempués de les tres presentaes nos postreros cuarenta años escontra Adolfo Suárez, Felipe González y la primera qu'encaró Mariano Rajoy l'añu pasáu y que tuvo como candidatu al líder de Podemos, Pablo Iglesias.

Tamién ye la primer vegada que'l presidente del Gobiernu nun ye diputáu, polo que nun pudo votase a sí mesmu, nin va poder facelo nel restu de plenos de la Cámara no que queda de llexislatura.

Al llevantar la sesión, la presidenta del Congresu, Ana Pastor, dio les gracies tanto a Rajoy como a Sánchez, dirixéndose a los dos con un "munches gracies, presidente".

Darréu y mientres la bancada del PSOE aplaudía , Mariano Rajoy averóse al escañu de Sánchez y estrechó-y la mano y, de siguío, abandonó l'hemiciclu.

Sánchez tamién recibió la felicitación d'Ana Pastor, del líder de Podemos, Pablo Iglesias, del presidente de Cs, Albert Rivera, y del voceru del PNV, Aitor Esteban, entre otros.

Mientres el nuevu presidente del Gobiernu recibía felicitaciones y aplausos de los socialistes, los diputaos de Podemos coriaron la conseña del so partíu, "sí se puede".