Rajoy da anuncia de la so marcha: "Ye lo meyor pal PP, pa mí y pa España"

Convocará una xunta directiva nacional pa qu’al empar convoque un congresu estraordinariu qu’escueya’l so relevu

El líder del PP, Mariano Rajoy, dio anuncia güei de que dexará la Presidencia de la formación y cumplir el so mandatu hasta’l día que’l partíu elixa al so sustitutu: "Ye lo meyor pal PP, pa mi y pa España", dixo énte’l Comité Executivu Nacional. "Y lo demás nun m’importa nada", recalcó.

Rajoy amestó que va convocar una xunta directiva nacional pa qu’al empar convoque un congresu estraordinariu qu’escueya al so relevu, y esplicó que nun habrá cambeos agora na cadarma orgánica del partíu nin nel grupu parllamentariu porque entiende qu’eso debe facelo yá’l so sucesor.

Nesta despidida, Rajoy agradeció que se-y dexare dar anuncia de la so renuncia d’esti mou. "Aprecio no que val el vuestru respetu, soi consciente de la gran llealtá que tuvi, hasta l’últimu día", afitó.

Tamién aseguró que cumplirá les sos funciones como presidente del partíu hasta’l día nel que s’escueya’l so socesor, y por mor de la situación na que ta va facelo "cola prudencia y el grau d’intervención que fai falta" que, según dio a entender, sedrá’l mínimu.

Dempués de recibir un llargu aplausu de los asistentes, Rajoy destacó’l privilexu que supunxo ser presidente del PP durante 14 años, a los que se refirió como "los meyores" de la so vida.

Tuvo amás, un agradecimientu "mui especial" a tolos sos ministros, asina como a la vicepresidenta del Gobiernu, Soraya Sáenz de Santamaría, y tolos miembros del Comité Executivu del partíu, encabezáu pola secretaria xeneral, María Dolores de Cospedal.

A toos ellos, y a los demás miembros del partíu, dio-yos les gracies pola so ayuda y sofitu "en toa clase de circunstancies" vivíes, tanto les de celebrar los éxitos como les "contraries que fueron mui dures", énte les que siempres s’afitó la "unidá" del PP.

El líder del PP entamó esti anunciu sobre la so despidida recordando que lleva 37 años al serviciu del partíu en tou tipu de cargos, dende militante de base a presidente del Gobiernu, pasando per conceyal y nengún d’esos cargos foi por solicitalos.

"Por nengunu peleé pa quitar a naide, durante cuasi 40 años namái cumplí col mio deber onde’l partíu me pidía que tuviere", resaltó Rajoy, dempués de lo qu’anunció que cree que llegó’l momentu de "poner puntu final a esta etapa" al frente del PP, un partíu que debe "siguir avanzando col liderazgu d’otra persona".