Sánchez aspira a tener les meyores rellaciones con Israel a pesar de reconocer a Palestina

Sánchez garantiza que reconocer a Palestina "nun va escontra naide"

El Conseyu de Ministros aprobó güei’l reconocimientu del Estáu palestín. España amiéstase asina a la llista de 140 países que yá lo ficieron. Güei tamién lo aprobaron Noruega y Irlanda.

El presidente del Gobiernu, Pedro Sánchez, amosó esti martes el so deséu de tener "la meyor rellación posible" con Israel a pesar de qu’España reconoza a Palestina como Estáu y amosó’l so refugu "dafechu" a H.amás, que recordó que nun apuesta pola solución de los dos Estaos.

Sánchez manifestó la intención de caltener bones rellaciones col pueblu israelín na declaración institucional que fizo n’español y inglés enantes de la xunta del Conseyu de Ministros.

"L’Estáu de Palestina tien que ser vidable, con Cisxordania y Gaza conectaes per un corredor y con Xerusalén Este como la so capital y unificaes baxo’l Gobiernu llexítimu de l’Autoridá Nacional Palestina (...) Nun reconoceremos cambeos nes llinies de llende de 1967 que nun seyan les acordaes poles partes", esplicó.