Valerio comprométese a estudiar l’ERE d’Alcoa

La ministra refuga que’l Gobiernu intervenga la empresa

La ministra de Trabayu, Migraciones y Seguridá Social, Magdalena Valerio, comprometióse güei a "estudiar dafechu" l’Espediente de Regulación d’Empléu (ERE) estintitvu presentáu por Alcoa pa les sos plantes d’A Coruña y Avilés y refugó que’l Gobiernu intervenga la empresa.

Enntes de participar nun actu del PSdeG en Santiago de Compostela, y al entruga-y polos representantes de los trabayadores sobre la posibilidá de que’l Gobierno pudiere intervenir la empresa, la ministra aseguró qu’España nun ye una economía estatalizada.

"¿Cómo intervención? Nun tamos nun réximen comunista", dixo la ministra, qu’enantes se comprometiere a "estudiar dafechu" l’ERE pa dar una solución que confía en que seya "afayadiza" pa meyorar la situación de les miles de persones afectaes, ente trabayadores (unos setecientos) y les sos families.

Ayeri, nuna nueva xornada de protestes, los representantes de los trabayadores reclamaron n’A Coruña la intervención de la multinacional de los Estaos Xuníos por parte del Gobiernu pa evitar el pieslle de les sos fábriques d’aluminiu na ciudá gallega y n’Avilés (Asturies).

"El Gobiernu tien qu’aplicar darréu l’artículu 128.2 de la Constitución Española y intervenir les fábriques enantes de que seya mui tarde”, dixo a Efe’l presidente del comité d’empresa de la planta d’Alcoa n’A Coruña, Juan Carlos López Corbacho.

A pesar de qu’esti artículu nunca s’aplicó, Corbacho apuntó que “hasta agora nunca se dieren les condiciones; esto ye, que se trate d’una empresa estratéxica pal Estáu y que la so intervención respuenda al bien nacional”.

“Nel casu d’Alcoa esta intervención taría más que xustificada porque hai un monopoliu, ye l’únicu productor d’aluminiu primario d’España, tien les úniques tres plantes del Estáu: la d’A Coruña, la d’Avilés y la de San Cibrao (Lugo)”, señaló.

La ministra, amás, dixo que los temes de la reforma llaboral siguen tratándose na mesa de diálogu social.