Venti tonelaes de medicamentos y material sanitario, primer unviu d'España a Ucraína

España garantiza la seguridá de les llendes

El Gobiernu prepara yá ayuda humanitaria pa unviar a Ucraína dempués del entamu de la guerra nesti país por Rusia, mientres el ministru d’Asuntos Esteriores, José Manuel Albares, afirma que la seguridá de les llendes de la OTAN, de la que forma parte España, ta "garantizada dafechu".

"Quiero mandar un mensaxe de total tranquilidá a los españoles. La seguridá de los españoles ta garantizada dafechu pola acción conxunta del Gobiernu colos nuestros socios europeos y los nuestros aliaos de la OTAN", declaró a los medios na Base Aérea de Torrejón de Ardoz (Madrid) na recepción de 20 tonelaes de material sanitario pal primer unviu d’ayuda humanitaria a Ucraína.

Na mesma llinia, Albares defendió que "la seguridá de les llendes de la OTAN", en concreto les del flancu este que faen llende con Rusia y Ucraína, "ta garantizada dafechu", pero recordó que la OTAN ye "una organización defensiva, non ofensiva", y ye nesi marcu nel que tán actuando.

Enagora, el primer unviu d’ayuda humanitaria d’España consiste en 20 tonelaes de medicamentos y material sanitario por valor de más de 150.000 euros que se mandará nos díes vinientes per tierra hasta Polonia y dende ellí a Ucraína.

Amás, Albares confirmó qu’España unviará material defensivo a Ucraína "pa la protección de los civiles", anque nun concretó más al respective al señalar que ye un asuntu que depende del Ministeriu de Defensa.

Al respective de los dos convóis con españoles qu’abandonaron voluntariamente Ucraína al entamu de la guerra, comentó que’l primeru d’ellos, con 52 persones, ta "a piques de cruzar la llende" con Polonia, y el segundu, con más de 90 persones, ente elles la embaxadora d’España n’Ucraína y los últimos miembros que quedaben del personal diplomático, ta entá a mediu camín.

Acompáñenlos policíes del Grupu Especial d’Operaciones (GEO) a los que se sumarán una ventena d’axentes d’esti cuerpu que yá llegaron a la llende de Polonia con Ucraína, según informaron a Efe fontes del Ministeriu del Interior.

Queden n’Ucraína alredor de cien españoles que decidieron quedar "por voluntá propia", según Albares, y colos qu’asegura que’l Gobiernu nun va escatimar esfuerzos nel casu de qu’a la fin decidan salir.

Mui contundente el ministru de la Presidencia, Rellaciones coles Cortes y Memoria Democrática, Félix Bolaños, qu’aseguró nun actu celebráu esti sábadu en Bermeo (Bizkaia) que "entamar una guerra y que muerran seres humanos inocentes nun ye defender intereses xeoestratéxicos, ye acabar cola vida d’inocentes".

La vicepresidenta segunda del Gobiernu y ministra de Trabayu, Yolanda Díaz, dixo n’otru actu convocáu en Madrid que l’Executivu ta "volcáu dafechu" na situación humanitaria que ta provocando l’ataque de Rusia a Ucraína y ta preparando un continxente pa la llegada de refuxaos.

Mientres, en dalgunes comunidaes autónomes yá surdieron iniciatives d’ayuda, como ye’l casu de la Comunidá Valenciana, onde la Fundación Juntos por la Vida y el consuláu d’Ucraína tán entamando la evacuación d’unos 560 neños y neñes y dalgunos adultos dende Ucraína a Valencia al traviés de Polonia.

Amás, la ONG World Central Kitchen del chef asturianu José Andrés desplazóse a la llende ente Ucraína y Polonia p’alimentar a les persones que tán saliendo del país atacáu por Rusia.

Unos 150 ucraínos pasaron los últimos dos díes n’albergues de baldre facilitaos polos gobiernos de Cataluña, Valencia y Baleares énte la imposibilidá de poder regresar al so país como consecuencia de la invasión rusa, y l’Ayuntamientu de Madrid contactó con delles embaxaes y les ONG Acnur y Cruz Roja pa poner a la so disposición 250.000 euros pa refuxaos ucraínos.

Xestos solidarios que s’amiesten coles manifestaciones de protesta que siguieron esti sábadu en delles ciudaes españoles, como la de Barcelona, la más abondosa, onde unes 900 persones, les más rusos y ucraínos, amosaron el so refugu a la guerra.

En clave política, Vox esixó al xefe del Executivu, Pedro Sánchez, que cese a los miembros del Gobiernu y del PSOE que formen parte del foru Grupu de Puebla, a los qu’esta formación considera "aliaos" del presidente rusu, Vladímir Putin, por reclamar la retirada de les sanciones a Rusia.

Y el líder de Cs nel Parllamentu de Cataluña, Carlos Carrizosa, opinó que les lleis qu’impulsaron Oriol Junqueras (ERC) y Carles Puigdemont (Junts) nel Govern "sedríen del gustu de Putin", y pidieron a la formación naranxa que seya "dique de contención" municipal del "alien" independentista.