Más de 60 carreteres afectaes pola dana, ente elles l'A-3 y l'A-7 en Valencia

Unos 155.000 veceros d'Iberdrola tán ensin lluz na provincia de Valencia polos efectos de la dana

Más de 60 carreteres, les más de la rede secundaria, tán afectaes poles consecuencies de la lluvia torrencial qu’esbordó ríos y inundó víes sobre manera na Comunidá Valenciana y Castiella La-Mancha, onde les autovíes A-3 y A-7 rexistren tramos cortaos.

Tanto la Dirección Xeneral de Tráficu (DXT) como’l Ministeriu de Tresportes y Movilidá Urbana pidieron a los conductores nun ponese al volante, sobre manera pa dir per víes de Valencia, Castellón y Cuenca, por mor de la peor dana del sieglu, que yá causó 51 muertos.

Les afectaciones más graves tán en carreteres de Valencia, con cortes en dellos tramos de l’A-3, l’A-7, l’A-35, asina como’l baipás pa entrar na ciudá, les víes que la conecten con Alicante y les carreteres N-3, N-322 y N-330 al so pasu pelos pueblos de Picassent, La Alcudia, Requena, Buñol, Paterna, Alzira y Chiva (Valencia), ente otros conceyos.