Dos años de cárcel pal presidente de la Española de Tiru Olímpicu por apropiación indebida

Francés aseguró que los pagos ficiéronse a cuenta de la lliquidación d'una delda de la territorial cola nacional

El presidente de la Federación Española de Tiru Olímpicu foi condergáu a dos años de cárcel por un delitu siguíu d'apropiación indebida.

Miguel Francés Pumarada tamién foi inhabilitáu pal exerciciu de cargos en federaciones deportives nesi periodu. Los fechos socedieron cuando yera presidente de la territorial asturiana ente mayu de 2017 y abril de 2018.

Nel xuiciu celebráu na Audiencia Provincial n'Uviéu, l'acusáu argumentó que los cuasi 46.000 euros usaos fueron destinaos a pagos n'efectivo a la Federación Española por atopase en concursu d'acreedores.

Francés aseguró que los pagos ficiéronse a cuenta de la lliquidación d'una delda de la territorial cola nacional.

La Federación Asturiana renunció nel so día a la indemnización que pudiera corresponde-y por esti delitu.