Tráxicu fin de selmana nes carreteres con 12 persones muertes

El fin de selmana celebróse'l Día Mundial en Recuerdu de les Víctimes d'Accidente de Tráficu

Doce persones morrieron n’accidente de tráficu esti fin de selmana. Ente elles, 3 motoristes y un peatón que foi atropelláu por un camión. Amás de los 12 muertos, hubo 11 persones mancaes. Esti fin de selmana precisamente celebróse’l Día Mundial en Recuerdu de les Víctimes d’Accidente de Tráficu.

Ún de los accidentes más graves foi la madrugada del sábadu con dos mozos de 20 y 25 años muertos en Cambrils (Tarragona) al salir de la vía’l vehículu nel que viaxaben. Otru mozu quedó n’estáu críticu y otra, mancada de gravedá.

Tamién en Tarragona morrió un motorista al chocar escontra les grandes lletres que dan anuncia del entamu del términu municipal de Cunit.

En Girona, dos persones morrieron na autopista AP-7. El coche nel que viaxaben chocare escontra un camión pequeñu. Mientres taben nel arcén y fuera del vehículu fueron arrollaos por un tráiler que tresportaba animales.

Otres dos persones morrieron nuna carretera de Cartagena, en Murcia, y delles mancáronse, una mui grave. Una lancha soltóse del so remolque, y provocó un accidente nel que se vieron implicaos otros siete vehículos. Los individuos que tresportaben la embarcación diéronse a la fuga. Les primeres investigaciones apunten a que sedría una narcollancha.