Asturies recibirá 2,8 millones del fondu escontra la violencia machista

L'alcuerdu del Conseyu de Ministros dirá agora a la Conferencia Sectorial d'Igualdá

El Conseyu de Ministros dio’l preste a la propuesta de distribución ente les comunidaes autónomes, Ceuta y Melilla de los creitos presupuestarios destinaos al desendolcu del Pactu d’Estáu escontra la Violencia de Xéneru por importe de 100 millones d’euros de los que 2,8 corresponderán a Asturies.

L’alcuerdu dirá agora a la Conferencia Sectorial d’Igualdá, órganu nel que participen los gobiernos autónomos, pal so afitamientu y nella aprobaránse los criterios de repartu, atendiendo a la población, estensión xeográfica, o necesidaes específiques.

"Los fondos qu’aprobamos güei salven vides. Pero pa llegar siempres a tiempu pa toles muyeres tamién tenemos que modernizar los protocolos, ferramientes y actuaciones pa parar la violencia de xéneru, y facer permanente’l Pactu d’Estáu y la so financiación", apuntó la ministra d’Igualdá, Irene Montero, nun mensaxe en Twitter.