Blesa y Rato, condergaos a seis y cuatro años poles 'black'

Declaraos culpables d'una apropiación indebida del patrimoniu de la entidá

L'Audiencia Nacional condergó güei a los ex-presidentes de Caja Madrid Miguel Blesa y Rodrigo Rato a seis años y cuatro años y seis meses de prisión, respectivamente, al consideralos culpables d'apoderase indebidamente del patrimoniu de la estinta entidá al traviés del sistema de les tarxetes "black".

La sentencia, de 259 páxines y de la que foi ponente la xuez Teresa Palacios, tamién conderga al ex-director xeneral de medios de la entidá, Ildefonso Sánchez Barcoj, a dos años y seis meses de prisión como collaborador y cómpliz de la "mecánica desarrollada", mientres qu'al restu impón-yos penes d'ente tres meses y tres años de prisión.

La sala remóntase a 1988, pa esplicar que na presidencia executiva de Jaime Terceiro al mandu de Caja Madrid alcordóse "dignificar" les retribuciones de los conseyeros al traviés d'una tarxeta que vendría complementar les dietes que recibíen.

Con esa visa habilitábase disponer, dientro d'una llende de dineru, como compensación de los esfuerzos y dedicación de la entidá; sicasí, una vegada que Blesa llegó al frente "favoreció" qu'a los conseyeros y integrantes de la comisión de control facilitárase-yos una tarxeta ensin xustificar el gastu.

D'esta miente, "viabilizó una percepción dineraria que medraba a la dieta", que s'amplió en periodos de "fiestes o vacaciones", lo que demuestra "l'usu particular" escontra'l patrimoniu de la caxa.

La decisión conozse malpenes selmanes dempués de que la presidenta de la sección cuarta de la sala de lo Penal de l'Audiencia Nacional, Ángela Murillo, dexara vistu pa sentencia un xuiciu qu'empezó a finales del pasáu setiembre.