Díaz y Sánchez escenifiquen el so enfrentamientu nel alderique de les primaries socialistes

Patxi López insiste en centrar les intervenciones nel programa

Los tres candidatos a dirixir el PSOE zarraron güei l'únicu alderique enantes de les primaries del próximu domingu con llamamientos a la unidá y a la llealtá seya'l que seya'l resultáu del votu de los militantes.

Susana Díaz, Pedro Sánchez y Patxi López condensaron los sos mensaxes finales nun últimu minutu d'intervención caún, que zarró l'ex-secretariu xeneral.

La primera foi Díaz, que pidió'l votu de los afiliaos "dende la humildá, la decencia y la xenerosidá" pa reforzar la unidá y la fraternidá, convencida de que'l PSOE "ye lo meyor que-y pasó a España" y "lo que necesiten y esperen los ciudadanos".

Un PSOE, amestó, que diga siempre la verdá y fale claro dende cualquier requexu d'España.

Patxi López empobinóse a cada militante pa recordar que'l PSOE ye "la única esperanza" de defender a los "perdedores de la crisis y la globalización".

Sicaí, afondó en que los socialistes nun sedrán útiles si siguen dividíos y enfrentaos y si nun tienen claro que nun van votar "escontra naide, sinón a favor de la unidá" y d'un proyectu d'izquierdes.

Pela so parte, Sánchez consideró que'l PSOE necesita renacer y allugase "onde se merez, a la izquierda", pa nun "cronificar" l'abstención nin "apocar" al llau de la derecha.

Al so xuiciu, el PSOE volverá a ser un partíu ganador cuando seya coherente, xenerosu, qu'un secretariu xeneral nun tenga que dimitir "por cumplir cola palabra dada": "Que se respete llealmente'l veredictu de les urnes por parte de toles candidatures", conseñó.