El Gobiernu prohíbe, col refugu de les comunidaes del noroeste, la caza de llobos

N'Asturies nun se podrá cazar esta especie

España prohibirá la caza del llobu más arriba del Duero, lo que supón que n’Asturies nun se podrá cazar esta especie.

La decisión tomóla la Comisión Estatal de Patrimoniu Natural del Ministeriu de Transición Ecolóxica y el Principáu foi una de les comunidaes que votó a la escontra.

La decisión supón que’l llobu tea protexíu en tol país por igual, porque hasta agora taba prohibida la so caza más p’abaxo del Duero.

Asturies, como Cantabria, Castiella y Lleón y Galicia consideren qu’esta protección nun yera necesaria y poro, votaron a la escontra. Sicasí, y dempués d’un empate na primer y tensa votación, la midida salió alantre na segunda por mayoría simple.

Dempués d’esta decisión de la Comisión Estatal de Patrimoniu na que participen comunidaes y Ministeriu de Transición Ecolóxica aprobaráse una orde ministerial pa facela cumplir.

El comité científicu que recomendó la protección del llobu argumenta "la so importancia como patrimoniu cultural, científicu, asina como los servicios ambientales que produz la presencia d’esta especie nos ecosistemes naturales".

Les comunidaes que votaron a la escontra como Castiella y Lleón, Galicia, Asturies y Cantabria, cuenten conl 98% de la población de llobos d’España.

Les organizaciones agraries y ganaderes d’estes zones amosárense a la escontra de medrar la protección del llobu.

Pa los grupos ecoloxistes, sicasí, ye una victoria que marca’l futuru de la especie.