El PSOE gana les elecciones con 120 diputaos

El PP llogra 88 escaños, Vox 52, Xuníes Podemos 35 y Ciudadanos 10

El PSOE volvió ganar les elecciones con 120 escaños, tres menos de los llograos n'abril, lo que complica a Pedro Sánchez la formación d'un gobiernu d'izquierdes, tamién pol debilitamientu de Xuníes Podemos, mientres el PP y Vox xuben énte'l fundimientu de Ciudadanos.

Vox esperimenta un enorme ascensu que dobla la so representación nel Congresu, con 52 escaños frente a los 24 de los anteriores comicios, el PP xube hasta los 88 cuando tenía 66 representantes, y Ciudadanos sufre una debacle entá mayor que la que conseñaben les encuestes, al baxar de 57 a namás 10 escaños.

Too ello dibuxa un hemiciclu nel que nengún bloque llega a sumar los 176 diputaos que conformen la mayoría absoluta, polo que podría caltenese la situación de colapsu políticu que torgó a Sánchez ser investíu presidente y llevó a repitir les elecciones.

El conxuntu de la izquierda formáu por PSOE, Xuníes Podemos y Más País supera en siete escaños al bloque de la derecha, que componen PP, Vox y Cs, pero p'algamar la mayoría absoluta sedría imprescindible'l concursu d'ERC y el PNV que se convierten asina n'árbitros si Sánchez quixera de nuevo formar Gobiernu.