El PSOE tamién gana nel votu emigrante de les elecciones xenerales

Sánchez diz que’l PSOE ye "el partíu de la concordia" nel so 140 aniversariu

El PSOE tamién foi’l partíu más votáu ente los asturianos incluyíos nel Censu Electoral de los Residentes Ausentes (CERA) nes elecciones xenerales del domingu pasáu, al recibir 1.670 de los 5.149 votos emitíos.

Según l’escrutiniu definitivu emitíu pola Xunta Electoral Provincial, la participación llendóse al 4,37% del censu asturianu nel estranxeru, formáu por 117.732 persones, per baxo del 5,17% de los comicios de xunu de 2016.

El PSOE foi’l partíu más votáu ente los asturianos incluyíos nel CERA, con 1.670 votos, siguíu de l’alianza PP-Foro, con 839; Ciudadanos, con 824; Unidas Podemos, con 796, y Vox, con 564.

L’escrutiniu definitivu afita los resultaos del domingu pasáu, tanto pal Congresu, con tres diputaos pal PSOE y unu pa PP-Foro, Unidas Podemos, Ciudadanos y Vox; como pal Senáu, con tres senadores pal PSOE y unu pal PP.

Aniversariu del PSOE con mensaxes de felicitación en Twitter

El presidente del Gobiernu en funciones, Pedro Sánchez, felicitó al PSOE pol so 140 cumpleaños con un mensaxe na so cuenta de Twitter nel que destaca que "fuimos, somos y sedremos les sigles de la concordia pa construyir una España abierta al mundu, garantía d’estabilidá, progresu y igualdá".

El Secretariu Xeneral socialista recordó qu’esti xueves cúmplense 140 años de la fundación el 2 de mayu de 1879 del PSOE, y dixo a "los "compañeros y compañeres" qu’hai "munchu que celebrar".