Facienda acusa a Rato de defraudar unos 6,8 millones ente 2004 y 2015

Rato algamó rentes non declaraes penriba de los 14 millones d’euros

La ONIF, la Oficina Antifraude dependiente del Ministeriu de Facienda, acusa al ex-vicepresidente del Gobiernu Rodrigo Rato de defraudar al traviés d’un enriedu societariu 6,8 millones d’euros ente 2004 y 2015.

Según el caberu informe de más de 600 páxines remitíu pola ONIF al xulgáu d’instrucción númberu 31 de Madrid adelantáu por "El País" y al que tuvo accesu Efe, Rato algamó rentes nun declaraes penriba de los 14 millones d’euros ente 2004 y 2015, periodu nel que defraudaría hasta 6,8 millones.

Sicasí, si se refuguen los exercicios anteriores a 2009 y fiscalmente prescritos, el supuestu fraude sedría d’unos 5,4 millones d’euros, con cantidaes penriba de los 120.000 euros que se consideren delitu fiscal en tolos años.

L’ex-ministru d’Economía y Facienda, con un fortuna que s’investiga dende va dos años, cometiere’l fraude al traviés de "ganancies de patrimoniu non xustificaes derivaes del tráficu de perres col estranxeru y non declarao fiscalmente; ganancies de patrimoniu ensin tresmisión previa de rentes, rindimientos de xeres económiques como  conferenciante y gastos de la xera empresarial que nun son deducibles".

L’informe de la ONIF, clave pa siguir alantre na investigación xudicial, fala de tráficu de perres al traviés de les sociedaes panameñes Red Rose Limited y Westcastle, la británica Vivaway y la española Kradonara, que s’utilizaren p’atapar rentes y que’l so beneficiariu sedría’l propiu Rato.

L’entamu de la investigación del orixe de la fortuna del ex-vicepresidente del Gobiernu entamó n’abril de 2015, cuando la ONIF dio alerta a la Fiscalía de Madrid d’irregularidaes nel patrimoniu de Rato y entamó un proceso qu’entamó col rexistru de la so casa y el so despachu particular, l’embargu de documentación y la so detención televisada.

La denuncia d’Antifraude foi malapenes 24 hores dempués de que’l 14 d’abril trescendiere que l’ex-ministru taba siendo investigáu pola unidá d’intelixencia financiera, el Sepblac, dependiente del Ministeriu d’Economía, por un posible delitu de dineru ablanquiao tres acoyese en 2012 a l’amnistía fiscal a la que s’amestaron 30.000 contribuyentes.