La defensa del carbón xunta a la delegación asturiana nel Congresu del PSOE

Del Olmo xenera l'alarma al pidir acabar col usu del carbón nacional

La defensa de la supervivencia del carbón autóctono valió pa xuntar, polo menos nesti aspectu, a los dos sectores qu'integren la delegación asturiana que participa nel Congresu Federal del PSOE y de la que son parte 45 representantes.

L'alderique abrióse cola intervención del secretariu xeneral de WWF España, Juan Carlos del Olmo, que participa como invitáu, y que na so alocución ante'l plenariu agradeció la contribución del reelixíu secretariu xeneral, Pedro Sánchez, a la "descarbonización" del sistema de producción enerxética n'Asturies.

Les afirmaciones de Del Olmo ficieron surdir l'alarma na delegación asturiana respecto al conteníu final de los documentos que saldrán aprobaos del Congresu en rellación col futuru del carbón.

Sicasí, según el diputáu autonómicu y integrante del sector qu'apoyó a Susana Díaz nes primaries, Marcelino Marcos Líndez, dambos grupos tán d'alcuerdu "no cimero" y el debate céntrase más n'onde tienen qu'articulase dientro del documentu políticu les referencies al futuru del carbón, dalgo, que dixo, "naide pon en cuestión n'Asturia/es".

"Les espectatives de toos ye que salga un buen congresu nel que s'escueya a una Executiva fuerte y con un proyectu consolidáu y capaz d'ilusionar a la ciudadanía", amestó tres señalar que los "acaloramientos" nel alderique de los documentos "siempre los hebo" n'anteriores congresos y tamién esta vez.

Pal secretariu xeneral del SOMA-FITAG-UXT, José Luis Alperi, unu de los principales sofitos de Sánchez nes pasaes primaries n'Asturies, el programa del PSOE plantega la necesidá de que se faiga un Pactu d'Estáu pola Enerxía y abordar un periodu de transición hacia la descarbonización nel que les centrales térmiques sigan quemando hulla producío n'España.

Na mesma llinia faló l'alcalde de Llaviana, el tamién 'sanchista' Adrián Barbón, que conseñó que lo renovable nun ye abondo pa xenerar tola enerxía que necesita España y necesítense fuentes de respaldu onde tien que tar el "güecu" pal carbón, una cuestión que quedó "clara" nel 'congresín' de la FSA-PSOE nel que se plantegaron les enmiendes a la ponencia qu'agora se debate nel Congresu Federal.