Les enfermedaes circulatories, dixestives y los tumores, principales causes d'ingresu hospitalariu en 2021

Asturies, tercer autonomía con mayor tasa d'ingresos, por mor del avieyamientu de la población

Les enfermedaes del aparatu circulatoriu, del dixestivu y los tumores fueron les principales causes d'ingresu hospitalariu en 2021 per delantre del coronavirus. Esi añu Asturies encabezó la tasa d'hospitalización por dolencies del aparatu circulatoriu. Son datos qu'acaba d’asoleyar l'INE.

Dempués de cayer en picao en 2020, el segundu añu de pandemia les hospitalizaciones volvieron medrar nel nuesu país pero nun foi la COVID-19 la qu'acopó los ingresos sinón, per esti orde, les enfermedaes del aparatu circulatoriu, les del aparatu dixestivu y los tumores. Les infeicioses, ente les que s'inclúi'l coronavirus, quedaron en séptimu llugar.

Sicasí, si falamos de muertes, la COVID-19 desbanca al restu de patoloxíes. De les 222.000 persones que morrieron n'hospitales en 2021, cuasi'l 21% foi por esta infección respiratoria. Con too, ye un 0,8% menos qu'en 2020.

D'Asturies destaquen dos datos. Foi la tercer autonomía con mayor tasa d'ingresos per detrás de Cataluña y Aragón, fechu rellacionáu col avieyamientu de la población. La nuesa comunidá encabezó amás n'España la hospitalización por enfermedaes del aparatu circulatoriu.