Pedro Sánchez va pidir al Congresu prorrogar l'estáu d'alarma 15 díes más

Barbón sofita allargar l'estáu d'alarma y pide entainar na entrega de test

El presidente del Gobiernu, Pedro Sánchez, confirmó a los presidentes autonómicos que l'estáu d'alarma va allargase n'España otros 15 díes, según confirmaron fontes autonómiques.

Sánchez comunicó esti domingu la decisión del Executivu, que va necesitar l'autorización del Congresu, según marca la Constitución, nel entamu de la so intervención na videoconferencia que caltuvo colos presidentes de les comunidaes y ciudaes autónomes pa tratar la crisis del coronavirus.

El presidente del Principáu, Adrián Barbón, amosó'l so sofitu a la decisión del Gobiernu d'allargar quince díes l'estáu d'alarma pola pandemia del COVID-19 al empar que reclamó entainar a esgaya'l repartu de los test de detección y que se dea “prioridá dafechu” a les residencies de mayores.