Sánchez ufierta la mano pa un "gran alcuerdu nacional de rexeneración"

La moción de censura debatiráse’l xueves y el vienres d’esta selmana

La moción de censura presentada’l pasáu vienres pol PSOE escontra’l presidente del Gobiernu, Mariano Rajoy, y que busca investir al líder del PSOE, Pedro Sánchez, como nuevu presidente, debatiráse’l xueves y el vienres d’esta selmana.

Asina lo propunxo la presidenta del Congresu, Ana Pastor, al candidatu, Pedro Sánchez, fecha qu’aceptó’l secretariu xeneral del PSOE. En declaraciones a los periodistes, Pastor informó de que’l plenu entamará’l xueves viniente a les nueve la mañana.

La previsión de la Cámara ye que’l debate seya'l xueves de 9:00 a 21:00, y el vienres dende les 9:00 hasta’l mediudía, momentu nel que sedrá la votación.

Pastor xustificó la rapidez cola que se va aldericar la moción en que nun hai cuestiones importantes pendientes a debatir nel Congresu.

El líder del PSOE, Pedro Sánchez, ufiertó güei la mano a tolos partíos que consideren inaceptable que Mariano Rajoy siga al frente del Gobiernu pa "construyir un gran alcuerdu nacional de rexeneración".

Nel so discursu énte’l Comité Federal del PSOE, Sánchez volvió a apelar a los 350 diputaos del Congresu -"nin ún más nin ún menos", dixo- pa que "sepan que lo que ta en xuegu ye la confianza de la ciudadanía na política".

Sánchez recordó que la "nueva etapa" que propón abrir cola so moción de censura escontra Rajoy tien una "fueya de ruta clara: censura, estabilidá y elecciones pa que los españoles decidan".

El presidente de Ciudadanos, Albert Rivera, aseguró tar dispuestu a buscar col presidente del Gobiernu, Mariano Rajoy, un "fin ordenáu" a esta llexislatura, que ve acabada, si pon "fecha y hora" na seronda pa unes elecciones xenerales.

Al empar, ufiertó la mano al PSOE p’alcordar la convocatoria d’unes elecciones porque, según dixo, nun quier llegar a cualquier preciu al Gobiernu.

Una estratexa que Rivera tresmitió nuna rueda de prensa na sede d’Alcalá, al acabar la xunta estraordinaria que celebró la Executiva Nacional (37 miembros).

El vicesecretariu de Comunicación del PP, Pablo Casado, dixo güei que cola moción de censura que presentó’l PSOE, Pedro Sánchez corre’l riesgu de poner España "en manes d’independentistes y batasunos" y convirtiendo a los españoles en "rehenes" de Carles Puigdemont y Arnaldo Otegi.

"Nun se pue poner a España en manes d'independentistes y batasunos y que los españoles se conviertan en rehenes de Puigdemont y d’Otegi", alvirtió Casado en rueda de prensa na sede del Partido Popular al referise a los sofitos que necesitará Sánchez pa poder sacar alantre la so moción de censura escontra Rajoy.

El portavoz del PNV nel Congresu, Aitor Esteban, evitó güei confirmar si apoyarán la moción de censura del PSOE, y recordó que los que proponen son los socialistes y tendrán qu’esplicar de mano qué "quier facer", "con qué mayoríes" quier facelo y qu’idees tien pa Euskadi y Cataluña.

Esteban, en declaraciones nel Congresu enantes de la Xunta de Voceros, esplicó qu’hai munches "incógnites" sobre la moción de censura que se tienen que despeyar, y que’l líder del PSOE, Pedro Sánchez, entovía nun esplicó "cuándo quier disolver" les Cámares, "qué quier arreglar" y "con quién lo quier arreglar".

El portavoz axuntu de JxCat, Eduard Pujol, marcó güei distancies cola moción de censura impulsada pol líder del PSOE, Pedro Sánchez, y entrugóse "qué ganen los catalanes sustituyendo a un presidente corruptu" y "pésimu" por un "cómpliz" de l’aplicación del artículu 155 de la Constitución.

En declaraciones dende’l Parlament, Pujol dexó claro qu’a JxCat nun-y "gusta nada" el presidente del Gobiernu d’anguaño, Mariano Rajoy, pero punxo en cuestión que dende Cataluña haya que sofitar la moción de censura promovida por Sánchez, que nos últimos díes "insultó" al presidente de la Generalitat, Quim Torra.

La frialdad cola que JxCat acoyó la moción de censura de Sánchez contrasta cola primer reacción del voceru del PDeCAT nel Congresu, Carles Campuzano, que s'amosó abiertu a falar col PSOE, anque pidió al líder socialista qu’esta vegada la so iniciativa vaya "en serio".