Sánchez va pidir al Congresu prorrogar l'estáu d'alarma hasta'l 26 d'abril

Los casos de coronavirus n'España xuben a 124.736

El presidente del Gobiernu, Pedro Sánchez, afirmó esti sábadu que prevé prorrogar l'estáu d'alarma más allá del 25 d'abril -el plazu anunciáu güei-, pero dixo que nun va ser igual qu'agora, sinón qu'espera que puea recuperase "daqué" de vida personal, económica y social.

"Sométome a estos quince díes de nueva prórroga, pero yá anuncio que van venir más díes. Pero afito: nun los mesmos, van ser distintos, vamos entamar a percorrer esi pasiellu, a faer esa transición y a recuperar daqué de la nuesa vida non solamente personal sinón tamién económica y social", anunció Pedro Sánchez.

Na rueda de prensa na qu'anunció que va pidir al Congresu una nueva prórroga del estáu d'alarma hasta les dolce de la nueche del sábadu 25 d'abril, el presidente avanzó qu'un equipu d'epidemiólogos y científicos ta preparando yá'l plan qu'aplicar pa la "desescalada", cuando baxe la curva de contaxo.

Y anunció que la previsión ye que l'estáu d'alarma tenga que prorrogase más, porque dempués del 25 d'abril -dixo- "desgraciadamente" nun acabaría too.

Sicasí, sí espera'l presidente que puean entamar a recuperar "dellos espacios de relación social".

Los casos de coronavirus n'España xuben a 124.736

El Ministeriu de Sanidá confirmó esti sábadu un total de 11.744 muertos con coronavirus tres sumar otros 809 muertos nes postreres 24 hores, un 7,3% más, nes que se contabilizaron amás 7.026 nuevos contaxaos, que yá algamen la cifra de 124.736 dempués de medrar la cifra nun 5,9%.

Tamién apuntó que 6.532 pacientes tán ingresaos na UCI, 116 más (un 1,8% superior al día anterior), y otres 3.706 persones más recuperáronse del COVID-19, colo que yá son 34.219 (un 12,1% más), según los últimos datos daos pol departamentu que dirixe Salvador Illa.