Santamaría y Cospedal competirán por ser la primer muyer presidenta del PP nacional

Casado, Margallo, Hernández y Bayo, los otros contrincantes

La ex-vicepresidenta del Gobiernu, Soraya Sáenz de Santamaría, y la secretaria xeneral del PP y presidenta del partíu en Castiella-La Mancha, María Dolores de Cospedal, dieron anuncia güei de la so candidatura pa presidir el PP.

Soraya Sáenz de Santamaría definióse como una "militante más" que se presenta a la Presidencia del PP con una candidatura qu’ufierta "humildá, responsabilidá y integridá", lo que cree que quieren munchos militantes.

La diputada del PP aseguró que’l proyectu que va defender ye "abiertu y en positivu" y piensa construyilu "escuchando y dialogando, cooperando y integrando".

Per parte de so, Cospedal solliñó que la suya ye "una propuesta d’integración y de suma positiva pal futuru" cola que propón "recuperar la unidá del centro-derecha español".

"Quiero ser la primer muyer que presida’l PP y quiero ser la primer muyer que presida’l Gobiernu d’España", afirmó Cospedal y p’algamalo ufiertó la so esperiencia como secretaria xeneral del partíu dende va más d’una década, como ministra de Defensa y como presidenta de la Xunta de Comunidaes de Castiella-La Mancha.

Dambes disputarán el lideralgu del PP con otros cuatro contrincantes: el vicesecretariu de Comunicación, Pablo Casado; l’ex-ministru José Manuel García Margallo; el responsable de Rellaciones Esteriores José Ramón García Hernández y l’ex-presidente de Nueves Xeneraciones de la Comunidá Valenciana José Luis Bayo.

Unu de los máximos favoritos, el gallegu Núñez Feijoo arrenunció ayeri a esta carrera. El presidente de la Xunta de Galicia reconoció que meditó la posibilidá de presentar la so candidatura pero prefier facer política dende Galicia.