Suiza nun pon fecha pa la entrega del arxelín presuntamente implicáu nel Casu Ardines

L’acusáu entá tien que cumplir un añu de cárcel en Suiza por delitos cometíos dempués del asesinatu

El ciudadanu de nacionalidá arxelina investigáu como unu de los dos presuntos autores materiales de la muerte del conceyal d’IX nel Ayuntamientu de Llanes Javier Ardines, n’agostu de 2018, entá tien que cumplir en Suiza un añu de cárcel por delitos cometíos dempués del asesinatu, poro, entá nun ye posible la so entrega a España.

K.M. foi condenáu en Suiza’l 18 d’avientu pasáu a una pena de 22 meses de cárcel, de la que se tien que quitar los 310 díes que pasó en prisión preventiva, poro, quéda-y por cumplir un añu, según comunicáu la Subdirección Xeneral de Cooperación Internacional del Ministeriu de Xusticia al Xulgáu de Primer Instancia y Instrucción de Llanes.

Poro, les autoridaes suices señalen que nun puen dar, enagora, la fecha na que’l reclamáu podría ser escarceláu en llibertá condicional, informó’l Tribunal Cimeru de Xusticia d’Asturies (TCXA).

Sicasí, la Oficina Federal de Xusticia de Suiza comprometióse otra vuelta a tener informaes a les autoridaes españoles sobre la execución de la citada pena en Suiza y, en particular, de cuándo podrá ser efectuada la entrega del home pa que puean llevase alantre cola dirección de la maxistrada de Llanes les dilixencies pendientes.

Estes dilixencies nun pudieron llevase alantre enagora pola negativa de les autoridaes suices a la estradición provisional del investigáu.