Susana Díaz llánzase a les primaries "pol PSOE y por España"

Defende la necesidá d’un proyectu ganador

La presidenta andaluza, Susana Díaz, dio anuncia güei "feliz" y con "arguyu" la so candidatura a les primaries pa liderar el PSOE y dixo que lo fai "pol PSOE y por España", pa "ganar" les xenerales y pa garantizar un proyectu "autónomu" y un partíu que "nun s’entregue al modelu d’otros".

"España necesítanos y el PSOE ta dispuestu a facese cargu, güei tamos equí pol PSOE y por España y vamos a salir a la cai con fuercia, diciendo que somos el PSOE, el de siempres, el d’agora, el del futuru y el que nun llegaremos a conocer", proclamó Díaz na presentación del so proyectu de partíu y de país, acompañada polos ex-presidentes del Gobiernu Felipe González y José Luis Rodríguez Zapatero.

Un actu nel qu'axuntó a unos 4.500 militantes, cargos y dirixentes históricos del partíu -9.000 según el so equipu- y pal que la organización tuvo qu'habilitar un segundu pabellón n'Ifema, la Feria de Madrid. "Anda, que si al final nun lo digo", bromeó con ellos de l’anuncia de la so candidatura.

Díaz, qu’ensin nomalu criticó’l proyectu que representa´l so principal rival, Pedro Sánchez, atribúi a esti "el votu del rencor y el resentimientu" y garantizó que con ella’l PSOE siguirá "calteniendo como siempres un proyectu autónomu", porque "una cosa ye pactar col PSOE y dalu al modelu d’otros", dixo al respeutive de les aliances con Podemos que defende l’ex-secretariu xeneral.

"Quiero ganar les primaries y les elecciones, pero nun quiero’l poder a cualquier preciu", afirmó la líder de los socialistes andaluces, al empar qu’avisó de que "más a la izquierda del PSOE nun hai nenguna izquierda tresformadora".

Díaz reclamó unes primaries "llimpies", que nun se conviertan nuna "carrera d’agravios" nin de 'marketing', nun discursu de cuasi una hora nel qu’apeló al sofitu de los "socialistes que van con lluces llargues", a los de la "esperanza" y la "ilusión".

Díaz afondó en que’l de so ye un proyectu colectivu, poro, pidió "el sofitu de toos" y dio anuncia de que percorrerá toles agrupaciones socialistes p’algamar sofitos.

En tonu autocríticu, dixo ser "consciente" de los sos "errores" y de qu’hai coses que tien que "meyorar", anque alvirtió -en presencia de sos pas- de que nun va arrenunciar a sentise arguyosa del so orixe de "casta de fontaneros" andaluces: "Soi andaluza, llévolo nel alma y toi arguyosa de la mio tierra".

Díaz reconoció que quier ser "la primer secretaria xeneral en 140 años d’historia del PSOE" y proclamóse como la candidata "cien por cien PSOE", lema de la so precandidatura, non ensin recordar: "nosotros pertenecemos al PSOE, pero’l PSOE nun nos pertenez".

Amás del coordinador de la ponencia política, Eduardo Madina, acompañaron a Díaz nel so llanzamientu a la carrera de les primaries la ex-aspirante a secretaria xeneral Carmen Chacón, los ex 'númberu dos' del PSOE José Blanco y Elena Valenciano, la ex-presidenta del PSOE Micaela Navarro, el secretariu xeneral de Mocedaes Socialistes d’España (JSE), Nino Torre, y la dirección en plenu de los socialistes andaluces.

Ex-ministros de Felipe González como Matilde Fernández y del Gobiernu de Zapatero, como Miguel Sebastián, Jesús Corbacho, Rosa Aguilar, José Bono medraron la llista de sofitos.