Un xefe de la Guardia Civil, a prisión polos sos venceyos col narcotráficu

La implicación del capitán d’Algeciras yera "vox populi ente los narcos"

El xefe de la Policía Xudicial de la Guardia Civil n’Algeciras (Cádiz) entró esti xueves en prisión incondicional dempués de ser prindáu pol so presuntu venceyu col narcotráficu nel Campu de Xibraltar qu’él tendría que combatir.

El capitán Joaquín F. foi prindáu ayeri miércoles dempués de munchos meses de discretes investigaciones de los servicios d’Asuntos Internos de la Guardia Civil pa comprobar les sos sospeches de que collaboraba con una organización de narcotraficantes de la zona.

Dempués de ser prindáu y pasar la nueche nos calabozos de la comandancia de la Guardia Civil de Cádiz, el que muchos años foi unu de los mandos encargaos na llucha escontra’l narcotráficu nel Campu de Xibraltar foi puestu a disposición del xulgáu d’instrucción númberu 4 d’Algeciras.

El xuez, que caltién secretes les dilixencies, decretó’l so ingresu en prisión provisional, comunicada y ensin fianza acusáu de revelación de secretos, omisión del deber de persiguir delitos, prevaricación y pertenencia a organización criminal.

"Yera vox populi ente los narcos", dico un axente dedicáu a la llucha escontra’l narcotráficu na zona.

Los investigadores creen que’l xefe de la Policía Xudicial collaboraba cola organización d’Abdellah El Haj, conocíu como’l "Messi del h.axís" y consideráu’l mayor narcotraficante del Campu de Xibraltar dellos años.

Según dalgunes fontes, esti xefe policial foi una de les persones qu’intervino nes negociaciones pa que’l "Messi del h.axís", fuxíu en Marruecos, s’entregare a la Xusticia española en payares de 2017, cuando algamó un pactu cola Fiscalía pol que quedó en llibertá dempués de pagar una fianza de 80.000 euros y comprometese a comparecer caldía nel xulgáu.