Nicolás Castellanos, misioneru español en Bolivia, reconoz el sofitu del Principáu y el Conceyu a la so obra social

La so Fundación creó 121 colexos, y esperen poder llevantar siete ilesies

Hai que fomentar la igualdá ente l'hemisferiu norte y sur. Un mensaxe qu'esti misioneru nun dexa de repitir. La llegada de más de 300 inmigrantes esti fin de selmana a España, ye un exemplu de que ye necesario un repartu más xustu de la riqueza asegura Nicolás Castellanos Franco, misioneru español en Bolivia, premiu Príncipe d'Asturies de la Concordia de 1998 y candidatu al premiu Nobel de la Paz en 2022.

Pa esti misioneru Venezuela ye l'exemplu de cómo un mal gobiernu pue desestabilizar un país. Esmolez-y la crisis que vive, cola ausencia de resultancies verificables tres les elecciones presidenciales. Cree qu'hai que tar alerta énte la crecedera del populismu n'Europa.

El padre Nicolás Castellanos arrenunció en 1991 al so cargu como obispu de Palencia pa trabayar polos más desfavorecíos como misioneru. Tres crear la so Fundación Hombres Nuevos ocupóse de los sectores más desfavorecíos de Bolivia; onde muerren cada añu 14.000 neños con muertes evitables. La so Fundación creó 121 colexos, y esperen poder llevantar siete ilesies, una vieya demanda ciudadana.