Más de 1.300 artificios pirotécnicos allumarán La Ría d'Avilés la nueche de los fueos

La Policía Local d'Avilés diseñó un operativu formáu por 140 persones y 40 vehículos

Más de 1.300 artificios pirotécnicos allumarán 17 minutos el cielu y La Ría d’Avilés la nueche del martes, 27 d’agostu, un espectáculu que foi diseñáu pola pirotecnia Pablo, de Cangas del Narcea, y que supón ún de los momentos más esperaos de les fiestes de San Agustín, informa l’Ayuntamientu.

Como cada añu, miles de persones daránse cita nel entornu del Centru Niemeyer y de l’Avenida Conde de Guadalhorce pa ver el espectáculu pirotécnicu que se llanzará dende les 23:55 del martes dende’l muelle de San Agustín.

Llanzaránse al cielu 1.325 artificios pirotécnicos, estructuraos en 512 secuencies controlaes con equipos dixitales y electrónicos de disparu y inxertarán referencies a iconos como’l Niemeyer o la bandera d’Avilés.