Bermiego debuta esti añu como candidatu a Pueblu Exemplar d'Asturies

El caltenimientu del so patrimoniu históricu ye la base de la so candidatura

​Falar de los encantos de Bermiego ye facelo en primer llugar del so milenariu texu, declaráu Monumentu Natural y un símbolu d’esti pueblu quirosán, que basa la so candidatura pa ser Pueblu Exemplar d’Asturies nel caltenimientu del so patrimoniu históricu.

La ilesia de Santa María, del sieglu IX, la capiya de San Antonio o la ermita de la Mercé son parte de la herencia del so más de mediu centenar de vecines y vecinos censaos, xuníos al rodiu del so centru social, en sestaferies pa recuperar l’antiguu llavaderu o pa celebrar hasta cuatro fiestes locales nel añu.

Bermiego cunta amás cola so asociación cultural. Tamién con banda de gaites, 'Los Cachapos'.

Dos conocíes rutes crucen el pueblu, la de San Melchor y la de Les Reliquies. Los sos vecinos esperen con ilusión convertise en Pueblu Exemplar.