El pintor Favila y el fotógrafu Nardo Villaboy roblen una esposición que se llevará a San Agustín de La Florida

L'amuesa podrá visitase hasta'l 29 d'avientu

La esposición presenta dalgunos chisgos al hermanamientu de les dos ciudaes. Estes torres de la cai Sant George son asemeyaes a les de la cai de Rivero d’Avilés, y la escultura del fundador de San Agustín tamién ye icónica nes dos ciudaes. L’amuesa constará de ventidós semeyes y otres tantes pintures. Les semeyes de Villaboy amuesen imáxenes panorámiques de los llugares más emblemáticos.

Favila quixo centrase nos pequeños detalles, nel color, na lluz y na calor que suelta la ciudá de San Agustín.

La esposición cobrará vida’l 1 de payares na ciudá de San Agustín de La Florida, la más antigua d’América, descubierta pol militar y marín avilesín Pedro Menéndez.

La esposición surdió por mor d’un pidimientu de la Sister Cities, una asociación cultural de gran relevancia de San Agustín de La Florida. Tanto Nardo Villaboy como Favila son dos vieyos conocíos. Villaboy tien asoleyaos dos llibros con temática de San Agustín de La Florida y Favila tien dos pintures y una escultura que son públiques nesa ciudá, amás de que’l más del so trabayu foi compráu por particulares.

L’amuesa podrá ser visitada hasta’l 29 d’avientu, nuna ciudá de 10.000 habitantes y con unos 3 millones de turistes al añu.