Sotres, Premiu Pueblu Exemplar d'Asturies 2024

El pueblu de Cabrales ta allugáu a más de mil metros d'altitú nel corazón de los Picos d'Europa

Sotres, llugar de Cabrales allugáu a más de mil metros d'altitú nel corazón de los Picos d'Europa, foi premiáu esti llunes col Premiu al Pueblu Exemplar d'Asturies 2024 que da la Fundación Princesa d'Asturies con collaboración col Gobiernu rexonal.

El xuráu, axuntáu nel Hotel de la Reconquista d'Uviéu, alcordó dar el galardón a esti pueblu de poco más d'un centenar de vecinos por "caltener y impulsar, nun espaciu d'altu monte, una actividá tradicional de base ganadera estensiva y sostenible, complementada con una industria agroalimentaria de calidá y col turismu".

L'acta destaca tamién la esistencia d'un "movimientu asociativu en puxu y mozu que caltién l'interés pola preservación del patrimoniu, el caltenimientu del paisaxe y la meyora de les infraestructures, y una notable dinámica sociocultural".