El Muséu Etnográficu de Grandas de Salime cumple 40 años con datos positivos de visitantes

Amuesa un mural figurativu pa reflexar cómo yeren los homes y muyeres del occidente

A falta de cerrar los datos definitivos del branu, el Muséu Etnográficu 'Pepe'l Ferreiro' de Grandas de Salime cunta con resultancies positives tres unos meses con más visitantes que nes mesmes feches d'otros años.

Susana Hevia, directora del Muséu Etnográficu de Grandas de Salime, esplica que'l muséu ta cumpliendo 40 años dende la so apertura y cuntó con diverses actividaes como presentaciones, meses redondes y recreaciones.

L'actividá que se ta desenvolviendo nestos momentos ye'l mural figurativu pa facilitar la interpretación de cómo yeren los homes y muyeres de toles edaes que conformaben l'occidente asturianu.

María del Roxo, artista, esplica que se trata d'un trabayu n'escala de grises con un tamañu de dos por siete que representa un día festivu de finales del S. XIX al pie de la capiya, una procesión onde tolos miembros de la sociedá tán presentes dende families con neños, trabayadores y miembros de la ilesia.

Un mural que forma parte d'un ampliu númberu d'actividaes pa conmemorar l'aniversariu d'un muséu que nos tresporta a dómines pasaes.