La sala Tizón de Xixón, una superviviente con cuasi mediu sieglu de vida

Ye ún de los pocos locales de conciertos que siguen activos n'Asturies

Abrió les sos puertes nel añu 1976 y dende entós supo sobreponese al pasu’l tiempu. La sala Tizón entamó siendo una sala de baille y foi evolucionando hasta convertise nuna sala de conciertos. Una de les poques que se caltienen actives en Xixón asegura Dani Tizón, programador de la Sala Tizón.

Y ye que les sales de conciertos como esta, son apreciaes pol públicu y son fundamentales, sobre manera, pa los músicos qu’entamen a tocar. Nelles ponen a prueba les sos canciones, medren profesionalmente y comparten con otros la so pasión pola música. Ente les paredes téxese la escena musical de la ciudá.

Baxo esa filosofía lleven yá cuasi 5 décades trabayando, siempres capitaneaos por Pepe, ún de los sos fundadores y ensin dulda, ún de los responsables de que la sala seya un referente.

Nestos cuasi 50 años tuvieron qu’enfrentase a diferentes retos, ente ellos saber adaptase a un nuevu públicu, cada vegada más amenorgáu y más sobreestimuláu. Pero siempres salieron airosos. Tienen clara la so misión: que la música na ciudá nun s’apague.