Construyir una ciudá amable pa los vecinos en 'Asturies Selmanal'

Nueva temporada de 'El Carboneru' percorriendo les Rutes Primitives de Tinéu

Impulsar la belleza de los espacios urbanos como una vía pa meyorar la calidá de vida de los sos habitantes. Esta idea inspira l’urbanismu que promueve la Xunión Europea, pero los espertos alvierten que ye más fácil de formular que de llevar alantre.

El programa 'Asturies Selmanal' reflexona, nel estrenu de la so nueva temporada, sobre cómo construyir una ciudá amable pa los vecinos, aquella que nun necesita filtros pa gusta-y a los sos ciudadanos.

Y dempués de 'Asturies Selmanal', al rodiu de les 23:00, TPA emite la película documental 'Cantares de una revolución', de Ramón Lluis Bande. Nella, el músicu Nacho Vegas visita dalgunos de los escenarios más significativos de la Revolución del 34. Cola música popular como filu conductor y coles palabres de Belarmino Tomás, presidente del Comité Revolucionariu, como brúxula.

Y darréu, otru documental sobre la insurrección de los obreros asturianos: '1934, el año de la revolución' inxerta’l testimoniu d’historiadores y especialistes, y recupera testimonios de participantes y testigos d’aquellos fechos.

Y más estrenos. Mañana enantes de 'TPA Noticies' primer edición, a les 13:15, volvemos a cocinar con 'El Carboneru'. David Montes visita les Rutes Primitives de Tinéu. Un trazáu que percuerre un tramu real del Caminu Primitivu al so pasu pel conceyu: dende la Capiya de San Roque hasta Oubona.

Amás de recetes, podrán conocer el paisaxe y diferentes actividaes como’l bolu celta y el batéu d’oru.