Poca ablana pero de muncha calidá en Piloña

Mui bones ventes d'un productu tradicional mui saludable

Poca ablana pero de muncha calidá y mui bones ventes. Esi ye'l saldu del Festival de l'Ablana de Piloña que punxo a la venta cuasi 2.300 quilos de frutu.

Cuasi 2,3 tonelaes d'ablana y 49 productores diéronse cita nun Festival nel qu'hebo munchu menos productu que l'añu pasáu. Menor cantidá pola alternanza nos plantíos, pero mayor calidá con diferencies según les zones.

La carpa tuvo enllena dende primer hora y dellos puestos escosaron tola mercancía en malapenes minutos.

Ablanes de siempre, turraes y de variedaes franceses, alemanes, galeses y hasta turques por un preciu de nueve euros el quilo, unu más qu'en 2023, que nun asustaron a los compradores.

Piloña vuelve convertise na capital d'un productu tradicional y bien conocíu polos sos munchos beneficios pa la salú.