Vecines de Piarnu texen a ganchiyu la decoración navidiega del so pueblu

Un árbol de Navidá de cuatro metros d'altura nun proyectu interxeneracional

Cuasi 2.000 cuadraos de ganchiyu texeron en dellos meses les vecines de Piarnu pa decorar el so pueblu esta Navidá baxo’l lema 'Yo engalano la Quintana'.

Con too esti material van montar un árbol de Navidá de cuatro metros d’altura. Agora van entamar a xunir les pieces una a una.

Un proyectu vecinal que valió tamién pa teneles actives y xuníes. Munches texeron nes sos cases, pero tamién cada vienres dende febreru xuntáronse pa poner en común el trabayu.

Artesanía de ganchiyu col verde como base pero con formes y colores mui variaos. Y dalgunos con diseños navidiegos qu’entamarán a engalanar les cais de Piarnu dempués de la ponte d’avientu.