El 41% de los adolescentes n'España tuvo o cree tener un problema de salú mental

Más de la metá nun pidió ayuda y un terciu nun lo cuntó a naide

El 41 % de los adolescentes n’España tuvo o cree tener un problema de salú mental nel últimu añu, anque más de la metá nun pidió ayuda y un terciu nun lo cuntó a naide.

Son datos del Barómetru d’opinión de los adolescentes sobre salú mental fechu por Unicef en collaboración cola Universidá de Sevilla, con les percepciones de cerca de 5.000 mozos y moces de 13 a 18 años compilaes en 168 centros educativos d’España.

"Hai un cambéu mui significativu sobre salú mental, sábese más, fálase más, pero falten datos y que se conoza meyor; los nuestros adolescentes cada vegada normalicen más falar de salú mental o identificar posibles problemes, pero entá sigue un ciertu estigma al rodiu del tema", esplicó José María Vera, director executivu d’UNICEF España na presentación del estudiu.