La presidenta de Magnum, premiu Princesa de la Concordia, abre les llegaes de los galardonaos

Pasión Vega y Ismael Serrano participen nuna mesa redonda sobre la obra de Joan Manuel Serrat

Cristina de Middel, presidenta de Magnum Photos, axencia reconocida col Princesa d’Asturies de la Concordia 2024, foi la primer galardonada en llegar a Uviéu pa recoyer el vienres viniente esta distinción de manes de la princesa Leonor.

De Middel (Alicante, 1975), ún de los grandes nomes de la fotografía contemporánea, llegó esti sábadu, pasaes les 19:00, al Hotel de la Reconquista de la capital asturiana. A les sos puertes foi recibida pola directora de la Fundación Princesa d’Asturies, Teresa Sanjurjo, y el soníu de les gaites.

L’axencia internacional Magnum Photos, fundada en 1947 polos 'padres' de la fotografía documental, Robert Capa, Henri Cartier-Bresson, David Seymour y George Rodger, foi galardonada nesta edición col Premiu Princesa d’Asturies de la Concordia.

Magnum foi distinguida pol so "icónicu y esixente" llabor de fotoperiodismu espardíu n’ocho décades nes que foi "exemplu de llibertá de prensa y asunción de riesgos".

Lleguen los primeros premiaos d’esta edición, pero les actividaes venceyaes con estos galardones entamaron va una selmana na Fábrica de La Vega.

Esta tarde foi l’escenariu d’un alcuentru onde se reflexonó sobre’l pensamientu de Michael Ignatieff, Premiu Princesa d’Asturies de Ciencies Sociales.

Tamién en La Vega, l’artista Pasión Vega, destacó esta tarde la valentía de Joan Manuel Serrat. La cantante malagueña emponderó’l valir como maestru d’artistes del Premiu Princesa d’Asturies de les Artes.

Pasión Vega tuvo un alcuentru xunto a los cantautores Ismael Serrano y Andrés Suárez. Los tres participen nuna mesa redonda sobre la obra de Joan Manuel Serrat, la so relevancia na música popular n’español y la so influencia nes xeneraciones siguientes.