Cifra récor por un Gamonéu del Puertu: 8.800 euros

La quesería Uberdón y Vega Ceñal, ganadores del certame

La quesería Uberdón, meyor Gamonéu del Puertu, y Vega Ceñal como meyor del Valle son los ganadores de la 44 edición certame del Quesu Gamonéu. Nél participaron 19 queseríes. Un alcuentru que cuntó con una cifra récor na so puya: 8.800 euros por un exemplar del Puertu que van pa l’Asociación ELA Asturies.

"A la d’una, a la de dos y a la de tres", cantaba José Manuel Abeledo, alcalde d’Onís, pa zarrar la puya pol meyor quesu Gamonéu de 2024 por 8.800 euros.

Los aplausos del públicu y l’alegría de la quesería Uberdón, meyor del Puertu, ye llóxica dempués d’un añu de trabayu; como la de Vega Ceñal, como meyor del Valle.

Una puya con cifres récor, que va pa l’Asociación ELA Asturias y que cuntó con nueve puyadores, pero con un ganador que foi’l restaurán Casa Morán.

Un certame que cuntó con 16 queseríes del Gamonéu del Valle y tres del Puertu y que, ente toes, presentaron daqué más de 2.000 kilos de quesu con un preciu mediu de 38 euros lo del Valle y 52 lo del puertu.

Un manxar qu’esfrutaron vecinos de munchos puntos d’Asturies.

Una mañana enllena d’emoción colos premios a Enriqueta Gutiérrez y el so fíu Juan como pastores del añu y el reconocimientu a Tierra Astur pol so llabor d’espardimientu del Gamonéu.