L'especial de la entrega del Pueblu Exemplar en TPA foi'l programa más vistu n'Asturies el sábadu

Más de tres hores de retresmisión en directo que rexistraron cuasi un 32% de share

Miles d'asturianos optaron tanto'l vienres como'l sábadu por siguir los actos de los Premios Princesa d'Asturies al traviés de TPA.

El programa especial dende Sotres, de la entrega del Premiu al Pueblu Exemplar, violu una media de 39.000 persones y llegó a algamar el picu de 92.000 espectadores únicos: esto ye, televidentes que conectaron en dalgún momentu con esa retrasmisión.

Tres hores y media de tresmisión en directo que rexistraron cuasi un 32% de share y qu'implicó un importante espliegue técnicu y humanu. El programa foi líder nel so horariu y la emisión non informativa más vista del día n'Asturies.

Tamién los actos d'entrega de los premios Princesa tuvieron un ampliu siguimientu al traviés d'esta cadena. La ceremonia del Teatru Campoamor algamó cuasi'l 17% de cuota de pantalla, con 35.000 espectadores de media nes más de tres hores de programa especial.

Llegó a algamar en dalgún momentu los 105.000 espectadores únicos. La gala en sí xubió los sos datos hasta los 45.000 espectadores y un 20,5% de cuota de pantalla.

L'informativu de tarde foi'l programa más vistu del día n'Asturies de toles televisiones. Al traviés de les nueses dos canales, TPA 7 y TPA 8, l'audiencia averóse al 10%, namás per detrás de Tele 5 y Antena 3.

Datos colos que TPA foi líder nesa franxa de la tarde del vienres. Ye por ello polo qu'a caunu d'ustedes, queremos da-y les nueses más sinceres gracies.