El Belles Artes acueye la so primer esposición dedicada al arte xaponés

L'amuesa ta formada por pieces vinientes del Muséu de Zaragoza

El Muséu de Belles Artes d'Asturies acueye dende esti xueves la so primer esposición dedicada al arte xaponés que va tar compuesta por más d'un centenar de pieces ente pintures, grabaos ukiyoe y laques urushi.

Sol títulu 'Xapón. L'eloxu de la elegancia –pintura, grabáu y laca de los sieglos XVIII y XIX-', l'amuesa ta formada por pieces del Muséu de Zaragoza.

Per un llau, vienen de la colección d'arte oriental de Federico Torralba (1913-2012), catedráticu d'Hestoria del Arte de la Universidá de Zaragoza y, per otru, de les colecciones d'obra gráfica xaponesa Pasamar-Onila y de M.A. Gutiérrez.

Dalgunes de les pieces espónense, amás, per primer vegada al públicu, faciendo d'esta amuesa un “acontecimientu únicu", informó l'equipamientu.

Dos estampes del pintor Léonard Foujita (1886-1988), procedentes de los fondos del Muséu de Belles Artes d'Asturies, completen esti percorríu pel arte xaponés.

L'amuesa, comisariada polos doctores n'hestoria del arte Yayoi Kawamura (Universidá d'Uviéu) y David Almazán (Universidá de Zaragoza), organízase en cinco secciones dedicaes, ente otres cuestiones, a la delicadeza de la guapura femenina y a axuntar oxetos de laca urushi, una de les manifestaciones artístiques más distintives de Xapón.

Tamién se dedicó un apartáu a la imaxe del mundu flotante, esto ye, del ukiyoe, al traviés d'un conxuntu d'estampes nes que se representen dalgunos de los temes más singulares del mundu xaponés -bijinga (muyeres guapes), yakushae (famosos actores de kabuki) y dalgunos de los samuráis más célebres (mushae)-.

Otros dos grandes bloques qu’igüen esta amuesa tán dedicaos a la pintura tradicional xaponesa, d'estilu Rinpa, y tamién a la ceremonia del té.

L'amuesa ciérrase cola presencia de dos xilografíes de Léonard Foujita (1886-1988), el más internacional de los pintores xaponeses del sieglu XX, procedentes de la colección del Muséu de Belles Artes d'Asturies.

Por cuenta de la esposición, el día 13 de payares la doctora n'Hestoria del Arte Yayoi Kawamura va impartir la conferencia 'L'eloxu de la elegancia: arte xaponés nel Muséu de Belles Artes d'Asturies' que va tener llugar nel Edificiu Históricu de la Universidá d'Uviéu.

Amás, el 14 d'avientu'l maestru calígrafu Mitsuru Nagata va llevar alantre una demostración de caligrafía de gran formatu na pinacoteca asturiana.