Rossy de Palma y Julián López van presentar la gala inaugural del FICX

El Festival Internacional de Cine de Xixón premia a Rossy de Palma      

L'actriz Rossy de Palma va ver reconocida la so trayectoria col Premiu Isaac del Rivero de la 62 edición del Festival Internacional de Cine de Xixón (FICX), que se va celebrar del 15 al 23 de payares, nuna gala d'inauguración que va tar conducida pol intérprete Julián López.

El certame, que foi presentáu esti vienres, va proyectar un total 169 títulos, de los que más de 70 van ser estrenos n'España y 15 son premieres mundiales o estrenos absolutos.

Amás de Rossy de Palma, la directora, guionista, actriz y productora griega Athina Rachel Tsangari y el precursor del cine underground español y francés Ado Arrieta van recibir los Premios d'Honor; l'actriz danesa Lone Fleming, el Premiu Xeneración Mutante "en reconocencia a una radiante y estensa trayectoria con más de 40 películes", y la directora y guionista catalana Carla Simón, el Comadre de Cine, concedíu en collaboración cola Tertulia Feminista Les Comadres

Según detalló'l director del Festival Internacional de Cine de Xixón, Alejandro Díaz Castaño, sobre 200 cineastes van pasar pel festival, ente los que destaquen directores como Radu Jude, Albert Serra y Montse Triola y intérpretes como Ingrid García-Jonsson, Ramón Barea, Assumpta Serna, Julián López o Joaquín Reyes

La cinta que va inaugurar el FICX va ser el curtiumetraxe 'La causa del accidente que provocó el incendio", de Lope Serrano, que va preceder a la proyección del llargumetraxe musical '¡Gloria!', de l'actriz y cantautora italiana Margherita Vicario.

Alejandro Díaz Castaño celebró que cada vez s'entienda más" qu'esta cita cinematográfica ye "una ayalga cultural" y non un "arma que tirar no político".

El programador del certame, Tito Rodríguez, destacó ente otros aspeutos la "bona collecha de cine asturianu" na edición d'anguaño, con 18 curtiumetraxes y 19 llargos, 15 d'ellos producíos dafechu n'Asturies.

El voceru de Gobiernu del Conceyu de Xixón, Jesús Martínez Salvador, valoró que'l FICX seya "cada vez más grande, referencia y necesariu" y llegue a ser "daqué más qu'una institución" pa la ciudá.

Anguaño'l Festival va doblar la ufierta d'actividaes complementaries al respective d'ediciones anteriores, con un total de 28 que, sumaes a la programación del local Toma 3 y a les FICX Nights, marquen una medría cimera al respective d'otros años.