El FICX proyecta 'Xeneración Xixón Sound', na que participa RTPA

Albert Serra llega al festival p'amosar la so galardonada 'Tardes de Soledad'

Pase especial nel Teatru Xovellanos de 'Xeneración Xixón Sound', película documental pa la que s'axuntaron más de 60 testimonios que recuerden daqué que foi muncho más qu'un movimientu musical y cultural a principios de los 90. Cola participación de RTPA, güei pudo vese en primicia nel Festival Internacional de Cine de Xixón.

Cien minutos de metraxe y más de 60 entrevistes a persones que, quiera que non, formaron parte de la ‘Xeneración Xixón Sound'. Un movimientu que trescendió lo cultural y que, nos 90, punxo a la ciudá nel mapa de la música alternativa internacional.

Un trabayu documental que cunta cola participación de RTPA y que, según nos cunta’l so director, nun va quedar ehí.

Tres décades dempués, parte d'eses bandes siguen sobro los escenarios. Dalgunos de los sos miembros entamaron carreres en solitario. Sigan o non n'activo, la mayoría de quien formó parte d'esta xeneración, axuntáronse nesta película documental.

Ingrid García-Johnson y Ramón Barea protagonicen 'Una Ballena' de Pablo Hernando

Dempués d'esti pase especial, a les 22:00, nel Teatru Xovellanos, el públicu va poder esfrutar de 'Una Ballena', una película dirixida por Pablo Hernando que cunta la hestoria d’Ingrid, una asesina a sueldu solitaria que nunca falla nin dexa rastrexu.

La cinta protagonízala l'actriz del mesmu nome, Ingrid García Johnson, y Ramón Barea. Nun ye la primer vegada qu’Hernando visita'l FICX. Ye un habitual del festival, qu'en 2016 dedicó-y inclusive unu de los sos focos.

Albert Serra llega al FICX p’amosar la so galardonada 'Tardes de Soledad'

Albert Serra, el flamante ganador de la concha d'oru de San Sebastián, llegó güei a Xixón. Serra vien presentar la so galardonada y tamién polémica 'Tardes de Soledad'.

Un acercamientu al mundu de la tauromaquia que, según el xuráu internacional de Donostia, ye una obra d'arte que va perdurar nel tiempu.

Nel so posáu na sablera de San Llorienzo, el cineasta conseñó allabances a la so obra y aseguró que naide quedará indiferente na butaca tres ver la película.

El públicu va poder vela la tarde de mañana domingu nel Teatru Xovellanos.