Ana Belén recueye'l Premiu Pasionaria concedíu por IX de Xixón

L'artista recibe con "humildá y sorpresa" el galardón

L’actriz y cantante Ana Belén recibió con "humildá y sorpresa" el XXX Premiu Pasionaria que-y entregó l’Área de la Muyer d’Izquierda Xunida de Xixón, en reconocimientu a una llarga trayectoria de "compromisu políticu col feminismu y los derechos humanos".

“¿Qué fici yo pa merecer esto?”, entrugóse Ana Belén nes sos palabres d’agradecimientu al galardón que se-y dio nun actu celebráu na Colexata de San Xuan Bautista del Palaciu de Revillagigedo.

L’actriz dixo quedar “sorprendida” cuando n’ochobre pasáu informóse-y de que diba a entregáse-y el premiu, porque nun esperaba recibir un reconocimientu que nun fuere sobre la so trayectoria artística.

Ana Belén dixo que lu recibe “con humildá” porque “hai y hubo munches muyeres anónimes que contribuyeron a la llucha polos derechos” en mayor midida qu’ella mesma.

Amás, reivindicó la llucha de les muyeres qu’a lo llargo de la historia, sobre manera les que vivieron los tiempos de la República, semaron la semiente pa que “poco a poco” pudieren algamase los derechos y llibertaes d’anguaño.

L’Área de la Muyer d’IX buscó na trixésima edición del premiu Pasionaria reconocer el “compromisu de la cantante col derechu a un albuertu llibre y de baldre y la so participación en campañes escontra la violencia machista y por una igualdá real y efectiva ente homes y muyeres.