'Asturies Selmanal' analiza l'impactu de la reconocencia internacional de la sidra

El programa trata l'impulsu cultural que llevó a la sidra de ser una bébora rexonal a formar parte del patrimoniu universal  

La sidra yá lluz na pasarela internacional. Méritu que correspuende atribuyir tamién a xeneraciones anteriores a la nuesa. Luis Benito García, historiador y director de la Cátedra Universitaria de la sidra d'Asturies destaca "que ye una cultura milenaria, son datos oxetivos. Tenemos noticies documentales de la ellaboración de sidra y del plantíu de pumares n'Asturies, polo menos dende'l sieglu octavu”.

Pela so parte, Xuacu López, director del Muséu del Pueblu d'Asturies asegura que'l mundu cambió, pero la sidra siempres supo cambiar y adaptase. Mientres que Xuan de Con, antropólogu, esplica que la sidra, precisamente, ye un elementu facilitador d'esos venceyos y de eses relaciones, forma comunidá.

Francisco Ordoñez, llagareru, asegura qu'esti premiu va xunir a tolos asturianos y asturianes pa construyir daqué positivo alredor de daqué tan nueso como ye la sidra asturiano. Y Juan Stové, director del Muséu de la Sidra, apunta qu'esta reconocencia da puxu a la identidá d'Asturies.

Un estatus de prestixu que va traer más trabayu y nueves estratexes p’algamar desafíos pendientes.