La editorial asturiana Camelot remata la traducción al castellanu de les memories de Cher

La biografía de la estrella del pop ye númberu 1 de ventes nos Estaos Xuníos

La editorial asturiana Camelot remata la traducción al castellanu de les memories de Cher. Esti sellu asturianu lleva una década algamando les llicencies de venta de noveles d’artistes de la talla de Sharon Stone, Madonna o Mariah Carey.

Yera l’añu 1965 cuando’l dúu formáu por Cher y el so home Sonny Bono algamaba l’estrellatu con una canción d’amor. Conociéronse cuando ella tenía 16 años y él 27. Compartieron éxitos y fracasos nun matrimoniu tormentosu qu’acabó con ella na ruina.

Fía d’un padre estafador y heroinómanu y una madre aspirante a actriz, escribe que nunca nun quixo una vida cenciella pero que deseó daqué de normalidá. Rellata tamién el maltratu que sufrió la so amiga Tina Turner.

Y asina hasta 400 páxines qu’agora traduz la editorial asturiana Camelot. Tien méritu porque algamaron que’l xigante Harper Collins-yos diere los derechos pa comercializar el llibru.

Nos Estaos Xuníos yá ta nel númberu 1 de ventes y equí’l fenómenu paez replicase porque les reserves tán disparándose.