Avilés ultima los detalles de la construcción de les tres carroces nes que se van xubir les sos maxestaes d'Oriente

El tráficu va sufrir cortes, tanto na zona portuaria como nel centru de la ciudá, pa dexar el pasu de la cabalgata

Nun taller d'Avilés ye onde se texen los suaños. Trabayar a contra reló pa que les carroces de les sos maxestaes los Reis Magos tean acabaes a tiempu. Fueron munches hores d'esfuerzu. Agora queden los últimos retoques: el montaxe, la illuminación y daqué de pintura apunta Miguel Mulero, artesanu creador de carroces pa la cabalgata de Reis.

Poliespán, madera y tela son los materiales que dan vida a esti suañu; tres carroces, que dempués s'enllenarán de xuguetes, carambelos y la maxa de poder ver a les sos maxestaes d'Oriente.

N'Avilés, los Reis Magos van llegar a la ría a les seis de la tarde. D'ellí, van treslladase hasta'l colexu públicu El Quirinal, d'onde van salir a les seis y media pa percorrer les cais col so séquitu cargáu de regalos y xuguetes, na tradicional cabalgata. El tráficu va sufrir cortes, tanto na zona portuaria como nel centru de la ciudá, pa dexar el pasu de les sos maxestaes.