Últimos preparativos pal estrenu de 'Desde la lona' n'Avilés

La obra ye una traxicomedia que despertará nel espectador el so llau más reflexivu

Mañana estrénase n’Avilés 'Desde la lona' de Teatro Estudio Gijón. Ye una obra del dramaturgu arxentín Mauricio Kartun, dirixida por Miguel G. Expósito.

Nel Palacio Valdés estos díes son hores de trabayu pa recrear l’ambientación d’una obra que lleven ensayando ocho meses y qu’estrenen per primer vegada. Poco a poco l’escenariu convirtióse nun caleyón nel que los personaxes coinciden.

Too entama cuando una compañía d’amuesa de llucha llibre llega a un pueblu pequeñu. La falta de xente obliga a abandonar l’espectáculu y tolos miembros de la compañía marchen menos el xefe, que nun pue abandonar el llugar porque la camioneta nun arranca.

Van apaeciendo personaxes, y la cruda realidá, que se tresforma nuna historia de perdedores, pero tamién de dignidá, destaca l’actor Manuel Pizarro.

La obra ye una traxicomedia que despertará nel espectador el so llau más reflexivu, tratando temes d’actualidá como’l devenir de la cultura o l’actitú de la sociedá énte’l diferente, destaca l’actriz Martina Bueno.

L’estrenu absolutu será mañana xueves nel Teatru Palacio Valdés. Tamién tarán nel Xovellanos de Xixón el 9 d’abril.