Vero Rubio prepara'l so primer discu en solitario que va ver la lluz la próxima primavera: 'Vou'

Hasta'l 12 de febreru pue collaborase na campaña de micromecenalgu que llanzó la cantautora

Hai un requexu onde crez Vou, el primer álbum d'esta cantautora y multiinstrumentista de Noceda. Vero Rubio déxase dir, consciente, desenguedeyando alcordances, sensaciones, sentimientos, en cada melodía y arreglu. Seya de pianu, vientu metal, bodhran o n’armoniu. Too tien un por qué nesti proyectu intimista.

'Dixo miou padre', Premiu Camaretá al Meyor Cantar, dio-y l’emburrión pa entamar esti proyectu en solitario, que ye tamién mui coral. Hasta'l 12 de febreru puen ser los sos mecenes.

Caún de los 11 temes del álbum que va ver la lluz esta primavera constrúyese sobre un poema que se fai imaxe. Música, videu y un llibru qu'edita Trabe n'asturianu occidental son los tres caminos con un mesmu destín: dir, con una presentación qu’entá se ta decantando.

Esti Vou ye una reconstrucción, que podría ser la de cualesquier que la escuche.