Decenes d'estudiosos participen nel Congresu Mundial de Cultura Asturiana

Barbón reivindica la enseñanza del asturianu

El presidente del Principáu, Adrián Barbón, destacó esti martes l'apueste del Gobiernu rexonal pola enseñanza del asturianu, 40 años dempués de qu'empezara la docencia nesta llingua, nel so discursu na inauguración oficial del primer Congresu Mundial de Cultura Asturiana.

Na apertura del eventu, entamáu por Academia de la Llingua, nel Edificiu Hestóricu de la Universidá d'Uviéu, Barbón sorrayó que nesti momentu'l Principáu sigue ampliando la educación n'asturianu y eonaviegu, allugando les clases n'educación infantil y les escueles d'idiomes públiques, con más profesoráu, coles mires de garantizar el derechu a espresase nesta llingua.

"A pesar de que llevamos 40 años de camín, inda nun llegamos a la meta, pero podemos tar satisfechos del camín percorríu", afirmó'l presidente, que cifró en 23.000 el númberu d'estudiantes qu’anguaño tán deprendiendo asturianu, dende Primaria hasta Bachilleratu.

Tamién mentó que ta en marcha'l procedimientu pa declarar d'interés cultural les dances tradicionales, como fixeron cola asturianada, los sidros de Valdesoto, la misa de gaita, los bolos y la cultura sidrera.