El MUXA estrena una esposición que repasa los oríxenes del planeta tierra

La investigación ye obra del alemán Joachim Reitner del Muséu Gondwana das Praehistorium

El MUXA estrena güei una esposición que repasa los oríxenes del planeta tierra de la mano del muséu alemán Gondwana das Praehistorium. Ye una collaboración na qu’un investigador d’esi centru trai a Asturies el resultáu del so trabayu y inclusive dalgunes muestres de meteoritos.

La esposición supón un repaso a la formación de la tierra va 4.000 millones d’años, cuando se xuntaron los restos d’una supernova creando grandes estructures. Los meteoritos que la siguieron chocaron a gran velocidá y llevaben materia orgánico que xunto a les fuerces gravitacionales y la influencia de la lluna, de la mesma edá que la tierra, ficieron posible’l so progresivu desendolcu.

La so investigación ye obra del alemán Joachim Reitner del Muséu Gondwana das Praehistorium, que lleva 25 años investigando estos materiales n’Australia.

Esta esposición ye posible gracies a la collaboración ente los dos museos qu’entamó va dos años.

Pensada pa públicu adultu, esta colección pue visitase dende yá y podrá complementase con talleres.