'Raúl Mouro Origen', un proyectu únicu pa deprender técniques y conceptos cerámicos

El Premiu Nacional d'Artesanía abre'l so estudiu al públicu en Siasu

'Raúl Mouro Origen' ye’l nome del proyectu que’l recién ganador del Premiu Nacional d’Artesanía punxo en marcha nel so pueblo natal, Siasu, en Cangas del Narcea. La idea ye abrir el so estudiu al públicu, amosar el so trabayu y dar talleres. Esti fin de selmana, al traviés de la Escuela Torn de Barcelona, ocho profesionales o aficionaos a la cerámica viven la esperiencia.

Una oportunidá única pa deprender técniques y conceptos. Una esperiencia de torniáu intensivu, con persones que yá tienen conocimientos nel mundu de la cerámica, bien de forma profesional o como afición.

Ye la propuesta na que participen ocho persones, llegaes de distintos puntos d’España, tol fin de selmana en Siasu, nel pueblu natal de Raúl Mouro. Una forma de conocer de primer mano la forma de trabayar y la tradición alfarera del recién premiu nacional d’artesanía.

La propuesta forma parte del proyectu 'Raúl Mouro Origen', que busca ser tamién un puntu d’alcuentru p’artistes y profesionales.

Raúl Mouro, primer asturianu n’algamar el Premiu Nacional d’Artesanía, supo llevar la tradición alfarera de cerámica negra de L.lamas del Mouru que deprendió de la so familia a otru nivel, recuperando y rediseñando dalgunes de les pieces pa tresformales n’obres más contemporánees.